तनहुँ — तनहुँ–१ का नवनिर्वाचित प्रतिनिधिसभा सदस्य डा. स्वर्णिम वाग्लेले मतदातामाझ गरेको प्रतिबद्धता पूरा गर्न आफ्नो इमानदार प्रयास रहने बताएका छन् ।
मंगलबार दमौलीमा आयोजित नवनिर्वाचित संसदलाई प्रमाणपत्र वितरण कार्यक्रममा डा. वाग्लेले उपनिर्वाचनका क्रममा गरिएको घरदैलो कार्यक्रममा मतदातामाझ गरेका प्रतिबद्धता पूरा गर्न इमान्दार रहने बताएका हुन् ।
‘लोकतन्त्रमा एउटा व्यक्ति आएर जादुको छडी चलाएर चमात्कार गर्ने भन्ने हुँदैन, सबैको सामूहिक प्रयात्न हुन्छ, प्रणाली र सुदृढिकरणबाटै हुन्छ’, उनले भने, ‘हाम्रो टिमबाट गर्ने कामहरुमा मेरो इमानदार प्रयात्न रहनेछ । सबैको विश्वास लिएर सहकाय गरी तनहुँको विकास गर्नेछु ।’
आफ्नो जित पुरानो दलहरु, नेतृत्वप्रतिको वितृष्णा र नयाँ युवाहरुले नेतृत्व गरेको राजनीतिप्रतिको आशा पनि रहेको भन्दै उनले तनहुँवासीले गर्व गर्नसक्ने काम गर्ने प्रतिबद्धता व्यक्त गरे । साथै तनहुँवासीको आशा, भरोसा र विश्वासलाई डगमगाउन नदिने उनको भनाइ थियो ।
