इलामको ठूलो टुँडिखेलमा सञ्चालित दोस्रो संस्करणको इलाम गोल्डकप उपाधि न्युरोड टिम एनआरटीले जितेको छ । शनिबार भएको फाइनलमा लिग विजेता चर्च ब्वाइजलाई ३–० गोलान्तरले पराजित गर्दै डिफेन्डिङ च्याम्पियन एनआरटीले उपाधि दोहोर्‍याएको हो । एनआरटीको विजयमा विदेशी खेलाडी नेमारले १ र अञ्जन विष्टले २ गोल गरे ।

पहिलो हाफमा १–० गोलको अग्रता बनाएको एनआरटीले दोस्रो हाफमा विजय सुनिश्चित गरेको हो । पहिलो हाफमा नेमारले बललाई जाली चुमाए । दोस्रो हाफमा अञ्जनले आकर्षक हेडिङबाट गोल गरे । उनैले पेनाल्टीमा व्यक्तिगत दोस्रो गोल पनि गरे । उपाधि जितेसँगै एनआरटीले नगद १० लाख र उपविजेता चर्च ब्वाइजले ५ लाख पाएका छन् । दुवै टिमले ट्रफी, मेडल र प्रमाणपत्र पाए । मेन अफ् दि टुर्नामेन्ट अञ्जन विष्ट भए भने फाइनलको म्यान अफ् दि म्याच एनआरटीकै शिशिर लेखी भए ।

रेड हर्स फुटबल क्लबले आयोजना गरेको प्रतियोगितामा एनआरटी, संकटा क्लब, त्रिभुवन आर्मी, चर्च ब्वाइज, झापाको रेड स्टार, मच्छिन्द्र, भारत दार्जिलिङको जिटिए र आयोजक सहभागी थिए ।

नेपाल पत्रकार महासंघ इलामको अध्यक्षमा भीम चापागाई निर्वाचित हुनुभएको छ । अन्तिम मतपरिणाम अनुसार चापागाई ३५ मतका साथ विजयी हुनुभएको निर्वाचन अधिकृत सोम सुसेलीले जानकारी दिनुभयो ।

अध्यक्ष पदका प्रत्यासी राम योङहाङलाई ३ मतान्तरले पराजित गर्दै चापागाई प्यानल सहित निर्वाचित हुनुभएको हो । उपाध्यक्षमा लोकेन थेबे, कोषाध्यक्षमा भगिरथ भण्डारी, दलित सदस्यमा योगेन्द्र शखर निर्विरोध निर्वाचित हुनुभएको अधिकृत सुसेलीले जानकारी दिनुभयो ।

महिला उपाध्यक्षमा सुनिता राई(खालिङ्ग) ४७ मतका साथ निर्वाचित हुँदा प्रतिस्पर्धी शृजना श्रेष्ठले २१ मत प्राप्त गर्नुभएको छ । टीका खतिवडाले सचिव पदमा ४१ मत प्राप्त गर्दै विजयी बन्नुभएको छ । उहाँका प्रतिस्पर्धी बालकृष्ण बस्नेतललाई २१ मत प्राप्त भयो । खुल्ला सह–सचिवमा विनु खड्का ३६ मतका साथ निर्वाचित हुँदा उहाँका प्रत्यासी तीलविक्रम दर्जीले २९ मत प्राप्त गर्नुभयो । समावेसी सह–सचिवमा बलराम बराईलिले ३८ मत प्राप्त गर्दै ८ मतान्तरले ज्ञान केदिमलाई पराजित गर्नुभएको छ ।

महासंघको १६ सदस्यीय कार्यसमितिको महिला सदस्यमा सविता पाण्डे (४१), आदिवासी जनजाति सदस्यमा सुनिता मगर (३८), खुल्ला सदस्यहरुमा प्रकास नेपाल (४८), ठोमनाथ तिम्सिना (विनय) (४६), मनोज अधिकारी (४२), मनिस बस्नेत (४०), खेमराज ढकाल (३६) र रोशन काफ्ले (३८ं) मतका साथ निर्वाचित हुनुभएको निर्वाचन समितिका सदस्य सटेन्द्र जबेगूले जानकारी दिनुभयो ।

प्यानलबाट केन्द्रीय परिषद् सदस्यमा विप्लव भट्टराई, गणेश घिमिरे र सुजता सुनुवार समेत निर्विरोध हुनुभएको छ । यस्तै, प्रदेश परिषद् सदस्यमा शिव मुखिया, विमल दाहाल, दुर्गाभवानी पोख्रेल, राजीव नेउपाउने र सोम सुुनुवार समेत निर्विरोध निर्वाचित हुनुभएको छ । इलाममा पत्रकार महासंघका ७२ सदस्य मध्ये सनिवार सम्पन्न निर्वाचनमा ६९ जनाले मतदान गरेका थिए ।

अध्यक्षमा निर्वाचित चापागाईले इलामको पत्रकारिता र पत्रकारका लागि आफू जुनसुकै अवस्थामा पनि लागिपर्ने प्रतिबद्धता ब्यक्त गर्नुभएको छ । ‘इलाम शाखाले सक्षम, जुझारु, अनुभवी, व्यावसायिक र पेसाप्रति निष्ठावान् नेतृत्व खोजेको थियो,’ उहाँ भन्नुहुन्छ, ‘इलामका सञ्चारमाध्यम आर्थिक रूपमा धरासयी छन् । स्थानीय मिडिया टिकाएर पत्रकारलाई व्यावसायिक र पत्रकारितामै आत्मनिर्भर बनाउनु अहिलेको मुख्य आवश्यकता हो ।’ स्थानीय मिडिया र पत्रकारलाई पत्रकारितामै टिकाइराख्न कानुनी व्यवस्था गर्नुपर्ने उहाँको धारणा छ ।

‘स्थानीय सरकारले स्पष्ट मिडिया नीति बनाउनुपर्छ, स्थानीय पत्रकार र मिडियालाई माया–दयाले होइन, कानुनी रूपमा स्थानीय तहको स्रोत उपभोग गर्ने अवस्था सिर्जना गर्नुपर्छ, मेरो मुख्य उद्देश्य पनि यही हो,’ उहाँ भन्नुहुन्छ्, ‘इलामका पत्रकारलाई शिर ठाडो गरी गर्वसाथ म पत्रकार हुँ भन्ने आभाष गराउन महासंघले पहल गर्नेर्छ ।’

उहाँले २०६७ देखि ०७० सालसम्म पनि इलाम शाखाको सचिवको जिम्मेवारी पूरा गरिसक्नुभएको छ । त्यसपछि उहाँ दुई कार्यकाल महासंघको केन्द्रीय सभासद् हुनुभयो । प्रेस चौतारी इलाम शाखाको अध्यक्ष रहनुभएका चापागाईं २०६५ देखि ०६७ सालसम्म पनि चौतारी इलाम शाखाको सचिवमा कार्यरत हुनुहुन्थ्यो ।

चापागाईं १२ वर्षयता नागरिक राष्ट्रिय दैनिकमा कार्यरत हुनुहुन्छ । करिब अढाई वर्ष नागरिक दैनिकको विराटनगरस्थित कार्यालयमा डेस्क इडिटर ९कपी इडिटर०को समेत अनुभव भएका उहाँ पालिकापेजडटकमका सञ्चालक/सम्पादक हुनुहुन्छ ।

उहाँले इलाम एफएममा समाचार सम्पादक, वाचक, कार्यक्रम उत्पादक र प्रस्तोता, इलाम पोस्ट दैनिकको सहसम्पादकको जिम्मेवारी निर्वाह गर्नुभएको छ । नयाँपत्रिका राष्ट्रिय दैनिकमा पाँच वर्ष, न्युज २४ टिभीमा तीन वर्ष, नेपाल एफएम नेटवर्क, बिएफएम, इलाम आवाज साप्ताहिक, पूर्वमेची साप्ताहिक, पूर्णलोकतन्त्र साप्ताहिक, आँखा साप्ताहिक, मोफसल साप्ताहिक र क्यापिटल एफएमलगायत मिडियामा पनि उहाँले काम गरिसक्नुभएको छ । स

माजशास्त्र तथा मानवशास्त्रमा स्नातकोत्तर, शिक्षा संकाय र कानुन संकाय (पत्रकारिता विषय)मा स्नातक गरिसक्नुभएका पत्रकार चापागाईंले आमसञ्चार र पत्रकारितामा स्नातकोत्तर अध्ययन गरिरहनुभएको छ । सम्मानजनक मत प्राप्त गर्दै अध्यक्ष पदमा पराजित योङहाङले आफ्नो एजेन्डा नै चापागाईको पनि एजेन्डा रहेकाले श्रमजीवि पत्रकारको पक्षमा काम गर्न आग्रह गर्दै निर्वाचित टीमलाई बधाई दिनुभएको छ ।

झापाको बिर्तामोडमा आजदेखि शुरु भएको प्रथम झापा कप फुटबल प्रतियोगिताको उद्घाटन खेलमा त्रिभुवन आर्मी फुटबल क्लबले विजयी शुरुवात गरेको छ । आर्मीले मोरङको एलएक्स सिटी एफसीलाई ३–० गोल अन्तरले पराजित गर्दै क्वार्टर फाइनलमा स्थान बनाएको छ ।

आर्मीका लागि राष्ट्रिय टिमका स्ट्राइकरसमेत रहेका नियमित खेलाडी जिलेस्पीजंग कार्की, दिशान्त राई र निरज चौधरीले गोल गरे । भोलि आयोजक झापा ११ फुटबल क्लब र राष्ट्रिय जागृति क्लब इटहरीबीच खेल हुनेछ ।

आजदेखि शुरु भएको झापा कप फुटबल प्रतियोगिताको कोशी प्रदेशका मुख्यमन्त्री हिक्मत कार्कीले उद्घाटन गर्नुभएको हो । प्रतियोगिता पुस ८ गतेसम्म चल्नेछ ।

प्रतियोगिताको विजेताले नगद १० लाख तथा उपविजेताले नगद पाँच लाख रुपैयाँ पुरस्कार पाउने आयोजक झापा ११ फुटबल क्लबका महासचिव गणेश पोखरेलले जानकारी दिनुभयो । प्रतियोगितामा नेपालका नौ र भारतको एउटा क्लबको सहभागिता रहेको छ ।

नेपाल प्रिमियर लिग (एनपीएल) क्रिकेटमा आज पनि दुई वटा खेल हुँदैछन् । अहिले बिहान ९ बजे पोखरा एभेन्जर्स र काठमाण्डौ गुर्खाज तथा दिउँसो १ बजे चितवन राइनोज र जनकपुर बोल्ट्सले खेल्दैछन् ।

जनकपुर बोल्ट्स एक खेलअघि नै क्वालिफायरमा पुगिसकेको छ । आज खेल्ने अरू तीन वटा टोलीको पनि क्वालिफायर पुग्ने गणितीय सम्भावना कायमै छ । चितवन ६ खेलमा ६ अङ्कसहित चौथो स्थानमा छ । काठमाण्डौ ५ खेलमा ४ अङ्कसहित छैटौं तथा समान अङ्कसहित पोखरा सातौं स्थानमा छ ।

राष्ट्रपति रामचन्द्र पौडेलले विभिन्न पाँच वटा देशका लागि राजदूत नियुक्त गर्नुभएको छ । नेपालको संविधान बमोजिम मन्त्रिपरिषद्को सिफारिसमा राष्ट्रपति पौडेलले उहाँहरूलाई नियुक्त गर्नुभएको हो ।

राष्ट्रपति कार्यालयका प्रवक्ता शैलजा रेग्मी भट्टराईका अनुसार प्रकाशमणि पौडेललाई गणतन्त्र पोर्चुगल, सनिल नेपाललाई स्पेन, प्रा. डा. कपिलमान श्रेष्ठलाई गणतन्त्र दक्षिण अफ्रिका, सेवा लम्साललाई बेल्जियम र डा. शिवमाया तुम्बाहाङफेलाई गणतन्त्र कोरियाका लागि नेपालको आवासीय राजदूत पदमा नियुक्त गर्नुभएको हो ।

नेपाल प्रिमियर लिग (एनपीएल) क्रिकेटमा विराटनगर किंग्सले पोखरा एभेन्जर्सलाई एक सय ४० रनको लक्ष्य दिएको छ । कीर्तिपुरको त्रिवि क्रिकेट मैदानमा टस जितेर ब्याटिङ गरेको विराटनगरले २० ओभरमा सात विकेट गुमाएर एक सय ३९ रन बनायो ।

विराटनगरका स्कट एडवार्डस्ले सर्वाधिक ४५ रन बनाए । पोखराका सागर ढकाल र रेमन रेइफरले समान दुई विकेट लिए । केहीबेरमा पोखराले जवाफी ब्याटिङ गर्दैछ । समान चार खेल खेलेका पोखरा र विराटनगर एउटा खेलमा जीत र तीन वटामा हार बेहोरेर तालिकाको पुछारमा छन् ।

आज हुने दोस्रो खेलमा दिउँसो एक बजे जनकपुर बोल्ट्स र काठमाण्डौ गुर्खाज खेल्दैछन् । जनकपुर पाँच खेलमा आठ अङ्कसहित तालिकाको दोस्रो स्थानमा छ । काठमाण्डौ चार खेलमा चार अङ्कसहित तालिकाको पाँचौँ स्थानमा छ ।

नेपाल पत्रकार महासंघ इलाम शाखाको नयाँ नेतृत्वका लागि पत्रकार भीम चापागाईंले अध्यक्ष पदमा उम्मेदवारी दिएका छन् । यही मंसिर २८ मा हुने निर्वाचनमा महासंघको वर्तमान इलाम शाखा सचिव रहेका चापागाईंले अध्यक्षमा उम्मेदवारी दिएका हुन् । इलामस्थित नेपाल प्रेस युनियन, प्रेस चौतारी नेपाल र स्वतन्त्र पत्रकारसहित संयुक्त व्यावसायिक प्यानलबाट चापागाईं साझा उम्मेदवार बनेको युनियन अध्यक्ष सविता पाण्डेले जानकारी दिइन् ।

२० वर्षयता पत्रकारितामा क्रियाशील चापागाईंले २०६७ देखि ०७० सालसम्म पनि इलाम शाखाको सचिवको जिम्मेवारी पूरा गरिसकेका छन् । त्यसपछि उनी दुई कार्यकाल महासंघको केन्द्रीय सभासद् थिए । प्रेस चौतारी इलाम शाखाको अध्यक्ष रहेका चापागाईं २०६५ देखि ०६७ सालसम्म पनि चौतारी इलाम शाखाको सचिवमा कार्यरत थिए ।

इलामकै माइजोगमाई गाउँपालिका–५, सोयाङमा जन्मिएर इलाम नगरपालिका–७ मा बसोबास गरिरहेका चापागाईं १२ वर्षयता नागरिक राष्ट्रिय दैनिकमा कार्यरत छन् । करिब अढाई वर्ष नागरिक दैनिकको विराटनगरस्थित कार्यालयमा डेस्क इडिटर (कपी इडिटर)को समेत अनुभव गरिसकेका उनी पालिकापेजडटकमका सञ्चालकरसम्पादक हुन् ।

उनले इलाम एफएममा समाचार सम्पादक, वाचक, कार्यक्रम उत्पादक र प्रस्तोता, इलाम पोस्ट दैनिकको सहसम्पादकको जिम्मेवारी निर्वाह गरेका थिए । नयाँपत्रिका राष्ट्रिय दैनिकमा पाँच वर्ष, न्युज २४ टिभीमा तीन वर्ष, नेपाल एफएम नेटवर्क, बिएफएम, इलाम आवाज साप्ताहिक, पूर्वमेची साप्ताहिक, पूर्णलोकतन्त्र साप्ताहिक, आँखा साप्ताहिक, मोफसल साप्ताहिक र क्यापिटल एफएमलगायत मिडियामा पनि उनले काम गरिसकेका छन् ।

समाजशास्त्र तथा मानवशास्त्रमा स्नातकोत्तर, शिक्षा संकाय र कानुन संकाय (पत्रकारिता विषय)मा स्नातक गरिसकेका पत्रकार चापागाईंले आमसञ्चार र पत्रकारितामा स्नातकोत्तर अध्ययनको तयारी गरिरहेका छन् ।

पत्रकार चापागाईंले नागरिक राट्रिय दैनिकबाट सर्वोत्कृष्ट फिचर लेखन अवार्ड, प्रादेशिक शिक्षा पत्रकारिता पुरस्कार, प्रादेशिक आर्थिक तथा कृषि पत्रकारिता पुरस्कार, प्रादेशिक युवा जर्नालिज्म अवार्ड, प्रादेशिक मानवअधिकार वर्ष पत्रकारिता पुरस्कार, आशिष स्मृति पत्रकारिता पुरस्कार, उत्कृष्ट समाचार लेखन सम्मान, क्षेत्रीय शिक्षा लेखनवृत्ति, उत्कृष्ट सहसम्पादक सम्मान, महेश कार्की स्मृति खेलकुद पत्रकारिता पुरस्कार, उत्कृष्ट यातायात सेवा पत्रकारिता पुरस्कारलगायत पुरस्कार र सम्मान पाएका छन् ।

नेपाल पत्रकार महासंघको मंसिर २८ मा हुने निर्वाचनमा अध्यक्ष पदको उम्मेवार बन्दैगर्दा उनले इलामको पत्रकारिता र पत्रकारका लागि आफू जुनसुकै अवस्थामा पनि लागिपर्ने प्रतिबद्धता गरेका छन् । कोरोनाको समयमा इलामका पत्रकारलाई रिपोर्टिङ र समाचार सम्पे्रषण गर्नमात्र होइन, ज्यान जोगाउनै धौधौ भएका बेला महासंघ सचिवका रूपमा चापागाईंले इलाममा कार्यरत धेरैजसो पत्रकारका घर–घर पुगेर सेनिटाइजर, मास्क, औषधिलगायत वितरण गरेका थिए ।

‘पत्रकारका लागि अत्यन्त जटिल त्यो अवस्था सम्झिँदा अहिले पनि आङ जिरिङ्ग हुन्छ,’ उनी सम्झिन्छन्, ‘कोरोनाले संक्रमित सबैजसो पत्रकारका घरै पुगेर राहतका सामग्री हातैमा राखिदिएर फर्किंदा निकै जोखिम सामना गर्नुपरेको थियो । तर, पनि डगमगाएनौं । पत्रकारलाई सबैखाले सहयोग गर्नु हाम्रो सबैभन्दा ठूलो कर्तव्य–जिम्मेवारी थियो । सकेसम्म पूरा गर्ने प्रयास गरिएको हो ।’

महासंघ इलाम शाखाको अबको नेतृत्व सबै पत्रकारको साझा, समावेशी, सक्षम र क्रियाशील बनाउन आफू लागिपरेको चापागाईं बताउँछन् । ‘इलाम शाखाले सक्षम, जुझारु, अनुभवी, व्यावसायिक र पेसाप्रति निष्ठावान् नेतृत्व खोजेको छ,’ उनी भन्छन्, ‘इलामका सञ्चारमाध्यम आर्थिक रूपमा धरासयी छन् । स्थानीय मिडिया टिकाएर पत्रकारलाई व्यावसायिक र पत्रकारितामै आत्मनिर्भर बनाउनु अहिलेको मुख्य आवश्यकता हो ।’

स्थानीय मिडिया र पत्रकारलाई पत्रकारितामै टिकाइराख्न कानुनी व्यवस्था गर्नुपर्ने उनको धारणा छ । ‘स्थानीय सरकारले स्पष्ट मिडिया नीति बनाउनुपर्छ, स्थानीय पत्रकार र मिडियालाई माया–दयाले होइन, कानुनी रूपमा स्थानीय तहको स्रोत उपभोग गर्ने अवस्था सिर्जना गर्नुपर्छ, मेरो मुख्य उद्देश्य पनि यही हो,’ उनी भन्छन्, ‘इलामका पत्रकारलाई शिर ठाडो गरी गर्वसाथ म पत्रकार हुँ भन्ने आभाष गराउन महासंघले पहल गर्नुपर्छ ।’

यो प्यानलबाट उपाध्यक्षमा लोकेन थेबे, उपाध्यक्ष (महिला)मा सुनिता राई, सचिवमा टीका खतिवडा, सहसचिवमा विनु खड्का, सहसचिव (समावेशी)मा बलराम बराइली र कोषाध्यक्षमा भगीरथ भण्डारीले उम्मेदवारी दिएका छन् ।
सदस्यमा सविता पाण्डे, प्रकाश नेपाल, मनोज अधिकारी, ठोमनाथ तिम्सिना (विनय), योगेन्द्र शंकर, सुनिता मगर, खेमराज ढकाल, रोशन काफ्ले र मनिष बस्नेतले उम्मेदवारी दिएका छन् ।

प्यानलबाट केन्द्रीय परिषद् सदस्यमा विप्लव भट्टराई, गणेश घिमिरे र सुजता सुनुवारको उम्मेदवारी परेको छ । यस्तै, प्रदेश परिषद् सदस्यमा शिव मुखिया, विमल दाहाल, दुर्गाभवानी पोख्रेल, राजीव नेउपाउने र सोम सुुनुवारको उम्मेदवारी छ ।