झापा । भद्रपुरस्थित चन्द्रगढी विमानस्थलबाट २ किलोभन्दा बढी चाँदीसहित एक महिला पक्राउ परेकी छन्। उनी भारतीय नागरिक रहेको बताइएको छ ।
भद्रपुरबाट काठमाडौँ जानका लागि आएकी भारत उत्तराखण्ड देराजुङका ३० वर्षीया तेन्जिङ छिरिङ २ केजी ५ ग्राम चाँदीसहित पक्राउ परेकी हुन् ।
जिल्ला प्रहरी कार्यालय झापाका डीएसपी कृष्णकुमार चन्दका अनुसार शुक्रबार साँझ ६ बजेको समयमा बुद्ध एयरको विमानबाट काठमाडौँ जान लागेकी छिरिङको झोला प्रहरीले चेकजाँच गर्दा लुकाइछिपाई राखेको २ किलो ५ ग्राम चाँदीको दुई थान डल्लो फेला परेको थियो ।
उनको साथमा २८ हजार ५ सय भारतीय रुपैयाँ, २ थान एनसेलको सिम र एक थान भारतीय सिम बरामद भएको थियो । अवैध चाँदीसहित पक्राउ परेकी महिलालाई प्रहरी कार्यालय झापामा राखेर थप अनुसन्धान गरिरहेको डीएसपी चन्दले बताएका छन् ।
