साझा न्यूज \ कनकाई नदीमा माछा मार्न भनेर घरबाट हिँडेका कनकाईको वडा नं.४ त्रिवेणी टोलका युवा मृतअवस्थामा फेला परेका छन् ।
बिहिबार दिउँसो २ बजेदेखी बेपत्ता भएका कनकाईको वडा नं.४ त्रिवेणी टोलका २४ वर्षीय सविन श्रेष्ठ कनकाई माइ पुलदेखी पाचसय मिटर दक्षिणमा मृतअवस्थामा फेला परेको प्रहरीले जनाएको छ ।बिहिबार दिउँसो २ बजेदेखी बेपत्ता भएका श्रेष्ठको खोजी कार्यलाई स्थानीयबासीसहित प्रहरीले समेत तिव्रता दिएको थियो ।
तीनदिनदेखी बेपत्ता भएका श्रेष्ठको आज शनिबार दिउँसो १२ः३० बजेको समयमा पानीमा बग्दै गरेको अवस्थामा शव फेला परेको हो । आज शनिबार बिहानैदेखी स्थानीयबासी, जनप्रतिनिधिसहित जिल्ला प्रहरी कार्यालयको विपद्को टोली समेतको उपस्थितीमा खोजी कार्यलाई तिब्रता बनाइएको थियो ।
सोही क्रममा कनकाई ४ का वडासदस्य शेषप्रसाद प्रसाईँको नेतृत्वमा रहेको टोलीले श्रेष्ठको शब कनकाई नदीमा बग्दै गरेको अवस्थामा फेला पारेको जनाएका छन् । नदी किनारमा सिसौको लाफ्रामा अल्झिएको अवस्थामा श्रेष्ठको शव फेला परेको वडासदस्य प्रसाईँले जानकारी दिए ।
स्थानीय वडाका वडाअध्यक्ष रोशन सुवेदीसहित जनप्रतिनिधि, स्थानीयवासी सहित परिवारको उपस्थितीमा प्रहरीले शवको मुचुल्का उठाएर पोष्टमार्टमकोलागी प्रादेशिक अस्पताल भद्रपुर तर्फ लगेको जनाइएको छ ।
प्रहरीले थप अनुसन्धानकालागी श्रेष्ठसँगै घरबाट हिँडेका उनका अन्य २ जना साथीलाई समेत विहिबारदेखी नै नियन्त्रणमा लिएको इलाका प्रहरी कार्यालय झिलझिलेले जनाएको छ ।